Мемлекеттік кірістер департаментінің, жеке сот орындаушыларының, полиция және прокуратура қызметкерлерінің бірлесіп жұмыс жасау нәтижесінде жыл басынан бері салық төлемегені үшін Қостанай облысының 16 тұрғыны бір тәуліктен үш тәулікке дейін қамауға алу түрінде әкімшілік жауапкершілікке тартылды,-Мемлекеттік кірістер департаментінен хабарлады.
Сонымен қатар, 37 көлік айыппұл тұрағына қамалды. Мемлекеттік кірістер департаменті көлік құралы бойынша салық берешегін уақытылы өтемеген жағдайда сот орындаушыларының жұмысы шеңберінде берешекті мәжбүрлеп өндіріп алудың мынадай шаралары қолданылатынын еске салады:
-уәкілетті органдардың тіркеу іс-әрекеттерін шектеу;
-борышкердің елден тыс жерлерге кетуіне тыйым салу;
-борышкерді қамауға алу;
-жүргізуші куәлігінің қолданысын тоқтату;
-банктік шоттар мен өзге де мүлікке тыйым салу.
Бұдан басқа, жеке сот орындаушылары берешек сомасынан басқа берешек сомасының 25% — на дейінгі мөлшерде қосымша ақы алады.
Мұндай жағдайларды болдырмау үшін Қостанай облысы бойынша Мемлекеттік кірістер департаменті салық берешегінің бар-жоғы туралы мәліметтерді тексеруді және бар болған жағдайда қарыздарды өтеуді ұсынады.
Көлік иелерінің мемлекеттік кірістер органдарына жүгінбей-ақ өздігінен берешекті қарауға мүмкіндіктері бар.
Бұл үшін ҚР ҚМ Мемлекеттік кірістер комитетінің www.kgd.gov.kz сайтындағы «Электрондық сервистер» бөліміне, одан әрі «Салық берешегінің жоқ (бар) екендігі туралы мәлімет» бөліміне кіру қажет, сонымен қатар e-salyq Azamat мобильді қосымшасындағы – «Барлық сервистер» бөліміне, одан әрі «Салықтар мен әлеуметтік төлемдер бойынша берешектер туралы сервис» бөліміне кіріп те қарауға болады.