Карина ӘЛЖАН
 
Қоғам алдында ресми мемлекеттік қызметшілер көптің назарына түсіп, еленіп жүретінін білеміз. Дегенмен, олардың кәсіби өмірден тыс әр нәрсеге  қызығушылықтары бар екеніне мән бермейміз. Біреуі спортқа, не болмаса, шығармашылыққа басымдық беріп жатады. Бұл қызығушылықтар мемлекеттік қызметкердің  қоғамдағы маңызды міндеттері мен  әлеміне алуан түрлілік қосып, өмірдің ең ауқымды салаларында  даралық пен өзіндік ерекшелікке орын бар екенін еске салады. Бүгін біз сіздерді шығармашылықты қатар алып жүрген,  қаржы-шаруашылық бөлімінің басшысы, аудан әкімі аппаратының бас бухгалтері Динара Әбдіғапарқызы Қызылбасовамен таныстыруды жөн көрдік. 
 
Динара Жітіқара ауданының Мүктікөл ауылында дүниеге келген. Еңбек, шаруашылық, бақша дегеннің не екенін жақсы біледі. Тоқсаныншы жылдардың қиын-қыстау күндері Динараның ата-анасы сауда-саттықпен айналысып, ол көбінесе фермада қалатын еді. Сондықтан, балалық шағында ол жан-жағына жауапкершілікпен қарауға үйренді. Бұл қасиет оған қазіргі жұмыста да пайдасын тигізіп жатыр.
Ол үшін мемлекеттік қызметке апаратын жол оңай болған жоқ. Қаржы қызметімен байланысты мамандықты алған Динара Әбдіғапарқызы кез келген жұмысқа кірісіп, хатшы, бухгалтер болып та көрді. Ең алғаш мемлекеттік қызметке 2009 жылы Шевченков ауылы әкімі аппаратының бухгалтері болып қызмет атқарған еді. 2018 жылы ол қаржы-шаруашылық бөлімінің басшысы, аудан әкімі аппаратының бас бухгалтері лауазымына тағайындалды. Оған жұмыста тәжірибе жинауына достары – Рыскүл Қуантаева мен Гүлбаршын Баймұхамбетовалар  көмектесті. Қазір күнде әріптестері Динараны өте сауатты әрі жоғары кәсіби маман ретінде біледі.
Алайда  өмір бойы есеп, хаттамалармен ғана шектелген жоқ. Ол өте позитивті әрі шығармашыл адам екенін де көрсете білді. Қолдан жасалған кәсіби тұрғыда бірегей заттар мен  ойыншықтар тоқумен айналысты. Анасы Алтын Ұзаққызы оның тоқуға деген сүйіспеншілігін дамыта түсті. Олар әр кештерін тоқыма,  инелер мен үлпілдеп иірілген жіптермен бірге өткізетін еді.
«Әлі есімде… Бәрі балаларға арналған жылы жамылғыдан басталды. Содан кейін қызыма сыйлық болсын деп  сүйкімді қоянды тоқып шықтым. Ол ойыншық ешкімді бейжай қалдырмады, ісімізге үлкен жарнама болды десем де болады. Содан бері ол барлық сыйлықтарды жақындарыма, туған-туыстарыма және достарыма өз қолыммен жасап келемін», – дейді ол.  
Динараның бұл бұйымдарының тіпті зауыттан шыққан заттан айырмашылығы жоқ.  Оның әрбір ойыншығы өз алдына бір бөлек,  ерекше даралық пен сұлулыққа ие болып табылатын. 
«Бұл әрбір бұйымға жан-жүректің бір бөлігі салынады. Бұл хобби, мен үшін үлкен медитациямен тең. Жанымды әрдайым тыныштандырып, балалар үшін қуаныш сыйласа масаттанамын», –  деп тебіренді кейіпкеріміз.
 Иә, Динараның бұл жұмысы негізінен балаларға арналған. Оның қолында тек тоқу инелері ғана емес, сонымен қатар басқа да шығармашылық атрибуттар – қайшы, мата, түрлі-түсті қағаз және басқа да материалдарды байқаса болады.  Оның қолынан – дорба, балалар байқаулары мен көрмелеріне арналған қолөнер бұйымдары да шығады. Мұның барлығын жасамас бұрын, ол алдымен эскизге әдемілеп түсіріп алады.