Құрмет көрсету
2024-02-21, 11:05
Аякөз Сұлтан
1989 жыл 15 ақпан барлық интернационалист-жауынгерлердің жадында ең маңызды және көптен күткен күн – Кеңес әскерлерінің Ауғанстаннан шығарылған күні ретінде сақталады. Олар осы таулы аймақты тастап, үйлеріне отбасыларына қайтуға мүмкіндік алған кез еді. Бірақ он жылға созылған бұл сұрапыл соғыстан бәрі бірдей қайтып оралған жоқ, олар өздерінің интернационалдық әскери борышын өтеп, біздің жадымызда мәңгі сақталып қалады.
Кеңес әскерлерінің Ауғанстан жерінен шығарылғанына 35 жыл толуына орай «Қостанай минералдары» АҚ басқарма төрағасы Ербол Нұрқожаев еңбек күндерін туған зауытына арнаған Ауған соғысының ардагерлерімен кездесті. Ербол Сапарбайұлы ауғандықтардың батылдығы, әскери борышы мен еліне адалдығы үшін зор алғысын білдірді. Әрбір ардагерге құрмет көрсетіліп, кәсіпорын басшылығы тарапынан ақшалай сыйлық берілді.
Осыдан кейін-ақ Ербол Нұрқожаев ардагерлермен бірге интернационалист-жауынгерлерге арналған ескерткішке гүл шоқтарын қою рәсіміне қатысты. Ауғанстанда қаза тапқандардың барлығын бір минут үнсіздікпен еске алды.