Аякөз СҰЛТАН
 
28 ақпанда балалар өнер мектебінің мәжіліс залында Кеңес әскерлерінің Ауғанстан жерінен шығарылғанына 35 жыл толуына арналған «Ән бізді Жеңіске жетелейді» атты патриоттық ән байқауына ән сүйер қауым жиналды.

Іс-шараны Жітіқара ауданының жастар ресурстық орталығы ұйымдастырды. Бұл байқаудың мақсаты дарынды жастарға қолдау көрсету, талантты жастардың шығармашылығын арттыру. Оған Жітіқара ауданындағы мектептердің оқушылары мен 14 жастан асқандар қатысты. Жітіқара ардагерлері, Ауғанстандағы интернационалист жауынгерлері мерекелік іс-шараның құрметті қонағы болды.
Байқауға қатысушылардың орындауындағы әрбір ән, әрбір өлең тыңдарманның жүрегін тебірентті. Көрермендер барлық қатысушыларға ду қол шапалақтар арқылы қолдау көрсетті. Ал барлық әннен кейін көрермендер қонақтарға өз сұрақтарын қоя алды. Осы ретте қазылар алқасына қиын болса да, шешім қабылдау керек болды.
Байқау қорытындысы бойынша Абай атындағы мектеп-лицейінің оқушылары Айнелла Даушева мен Аружан Сарбасованың дуэті 3 орын және 10 000 теңгені жеңіп алды. Естай Есжанов атындағы №9 мектебі оқушысы Қайырбек Қонсықара 2 орын және 20 000 теңге. Байқауда №4 мектептің «Жауынгерлік» шығармашылық тобы жеңімпаз атанып оқушылар 30 000 теңге ақшалай сыйлыққа ие болды.
Ал қалған қатысушылар да назардан тыс қалмады – әрқайсысы алғыс хат пен 5 000 теңге алды. Құттықтаймыз!