Женевада 28 сәуірде Базель, Роттердам және Стокгольм конвенциялары тараптарының конференциясы басталды — бұл экология саласындағы ауқымды халықаралық келісімдер. Конференцияның жұмысы 9 мамырға дейін жалғасады, Қазақстан белсенді түрде талқылауларға қатысып, өзінің ұлттық мүдделерін, оның ішінде хризотил саласындағы мүдделерін қорғауда.
Биылғы форумның тақырыбы — «Көрінбейтінді көрнекі ету: химиялық заттар мен қалдықтарды реттеу мәселелерін рационалды шешу». Қатысушылар экологиялық зиянды әсерлері бірден байқала бермейтін мәселелерді, мысалы, қауіпті қалдықтардың жинақталуын, ауа, су, топырақтың ластануын талқыға салуда. Бұл жерде пластикалық ластануға, сынап қалдықтарына және электронды қалдықтардың өсуіне ерекше назар аударылады.
Қазақстан үшін хризотил асбестінің мәртебесін қорғау басты мәселе болып қала бермек. Күн тәртібінде тұрған мәселе- Роттердам конвенциясының ІІІ қосымшасына, аса қауіпті заттардың тізіміне хризотилді қайта қосуға қатысты көтеріліп отыр. Қазақстан делегациясы біркелкі көзқарас ұстанады: амфиболды асбесттерден айырмашылығы, хризотил бақыланатын жағдайда қауіпсіз. Бұл ұстаным халықаралық тәжірибе мен Халықаралық еңбек ұйымы №162 конвенциясының нормаларына негізделген.
Қазақстандық хризотил әлемдік нарықта сұранысқа ие болып қала береді. Одан инфрақұрылымдық жобаларға қажетті асбест-цемент құбырлары, шифер, қасбеттік панельдер шығарылады.Салаға қолдау көрсету — бұл жұмыс орындарын қорғау, өнеркәсіпті дамыту және аймақтардың экономикалық тұрақтылығын қамтамасыз ету.
Айта кетейік, 2024 жылы Қазақстан маңызды бастаманы ұсынды: қатарынан үш рет консенсусқа қол жеткізілмеген мәселелерді шешу мүмкіндігін қарастыру үшін Роттердам конвенциясының ережелеріне өзгерістер енгізу. Бұл түзету процесуалдық тоқырауды жойып, елдерге нақты басымдықтарға назар аударуға мүмкіндік бермек.
Қазіргі уақытта хризотил туралы пікірталастар жалғасуда. Алайда, Қазақстан ғылыми деректерге, тәжірибеге және ақылға қонымды реттеу принциптеріне сүйене отырып, өз позициясын нығайтуда.
Редакция Женевадағы конференцияның барысын бақылап, оның қорытындылары туралы жедел ақпарат беруді жалғастырады.