Туған қаланың дамуы мен демалысқа қолайлы жайлы орындар жасау — бұл тұрғындарға деген қамқорлықтың маңызды бөлігінің бірі. Дәл осыны басты мақсат етіп қойған «Қостанай минералдары» АҚ Жітіқара қаласын абаттандыруға және пайдалы бастамаларды қолдауға белсене қатысып келеді.
 
Осындай игі істердің бірі — тұрғындардың сүйікті орындарының бірі саналатын орталық көлді жаңартуға көмек көрсету болды. Бұл жобаны іске асыру үшін қала құраушы кәсіпорын 20 миллион теңге бөлді.
Бүгінде көл маңына 15 антистресс орындық пен 15 сәндік көгалды гүлдер орнатылып, аумақ заманауи әрі жайлы көрініске ие бола бастады.
Атқарылған жұмыстар мұнымен шектелмейді. Жақын арада көл түбін тазарту, топырағын жаңарту, кейіннен су толтыру жоспарланып отыр.
Сонымен қатар, көлдің түбін жөндеу жұмыстары да қарастырылуда. Бұл шаралар көлдің экологиялық жағдайын едәуір жақсартып, оның қызмет ету мерзімін ұзартуға септігін тигізеді.
Жобаға мәдени элементтер де енгізілмек. Алдағы уақытта көл аумағына қазақ халқының өткен ғасырлардағы өмірі мен мәдениетін бейнелейтін Қазақстанның танымал суретшілерінің картиналары қойылады. Бұл өз кезегінде көлге ерекше көрік пен рухани мән береді.
Көлді абаттандыру бастамасы қала тұрғындарының ыстық ықыласына ие болды.

«Көлді қалпына келтіретініне қуаныштымыз, бұл демалу үшін өте қажет – қала ортасындағы жалғыз орын!», – дейді жергілікті тұрғындар.

«Қостанай минералдары» АҚ өз ұстанымдарын берік ұстанып келеді: өңірдің дамуын қолдау, тұрғындардың әл-ауқатына қамқор болу және Жітіқарада жайлы өмір сүру үшін жағдай жасау. Тек бірлескен күш-жігер арқылы ғана туған қаламызды көркейтіп, жайлы әрі заманауи етуге болады деп сенеді.