«Қостанай минералдары» АҚ — 60 жылдық тәжірибесі бар тұрақты даму жолындағы кәсіпорын. Мерейтойлық жылда компания өндірістік нысандарын жаңғырту жұмыстарын қарқынды жүргізуде. Алпыс жылдық тарихы – бұл тек өткен жетістіктер ғана емес, сонымен қатар алдағы өркендеу мен жаңару кезеңі. Кәсіпорын үшін басты құндылық – адам. Қызметкерлердің жайлылығы мен қауіпсіздігі әр бастаманың өзегіне айналған.
 
Бақылау алаңы – жаңа келбет
Бақылау алаңында Ecoline Decking террас тақталарымен қаптау жұмыстары басталып кетті. Бұл материал ғимаратты заманауи әрі тартымды етіп көрсетіп қана қоймай, сыртқы орта әсерінен сенімді қорғайды. Шатырды жөндеу де қатар жүргізілуде. Барлық жұмыстарды қыркүйек айының басына дейін аяқтау көзделген.
Байыту цехындағы өзгерістер
Цехтың 20 және 6 метрлік деңгейлерінде ішкі әрлеу жұмыстары жалғасуда: қабырғалар мен төбелер ақталып, есіктер мен тіреуіштер сырлануда. Мұның бәрі жұмыс аймағын жарық әрі таза етуге бағытталған.
Басқару ғимараты – жаңаша бейнеде
Байыту кешенінің басқару бөлімі енді стильді кіреберісімен көз тартады. Қасбет Ecoline Decking тақтасымен әрленген. Сонымен бірге, екінші қабатта да жөндеу жұмыстары жүргізілуде. Бұл жаңартулар ғимаратқа жаңа тыныс беріп, компанияның дамуға деген ниетін айқын көрсетеді.
Жаңарған жолдар – оңтайлы логистика
Склад пен автокөлік шаруашылығы аумағында асфальт төсеу жұмыстары жүріп жатыр. Бұл тек қозғалысты жеңілдетіп қана қоймай, шаң мен ластанудан қорғайды.
Кешенді жаңғырту – басты басымдық
Бұл бастамалар – «Қостанай минералдары» АҚ инфрақұрылымын жақсарту бағытындағы үлкен жобаның бір бөлігі. Басшылықтың сенімі мынадай: жақсы еңбек жағдайы — бұл өнімділік пен қауіпсіздіктің кепілі ғана емес, қызметкерлердің көңіл күйі мен ынтасына да серпін береді.