«Қостанай минералдары» акционерлік қоғамы 60 жылдық мерейтойын тек өндірістік жетістіктермен ғана емес, сонымен қатар кәсіпорын аумағын абаттандыру мен көркейту бағытындағы ауқымды жобалармен атап өтуде. Алты онжылдық ішінде компания тек өндіріс қуатын арттырып қоймай, өз кеңістігіне деген қамқорлығымен де ерекшеленіп келеді.
 
Жуырда сондай көркейту жұмыстарының жарқын үлгісі – кәсіпорын аумағындағы шолу алаңы жаңартылып, жаңа келбетке ие болды. Бұл орын карьерге — кәсіпорынның жүрегі саналатын өндіріс алаңына биіктен көз салуға мүмкіндік береді.
Жобаның аясында шолу алаңы толықтай жаңартылды: шатыры жөнделіп, ғимараттың сырты берік әрі сәнді Ecoline decking террассалық тақталарымен қапталды. Көріктендіру жұмыстары барысында сәнді жасыл өсімдіктер отырғызылып, гүлдермен көмкерілді. Алаңға жаңа орындықтар орнатылып, тынығуға жайлы жағдай жасалды. Ал басты назар аударатын элемент — заманауи стильде жасалған «I love KM» арт-нысаны болды. Бұл белгі компанияға деген мақтаныш пен сүйіспеншіліктің көрінісіндей әсер қалдырады.
Аталған жоба «Қостанай минералдары» АҚ-ның тау-кен көлік кешені ұжымының басшысы — Богдан Умербеков және «МинералСтройСервис» ЖШС командасының жетекшісі — Ғазиз Мырзабаев бірлескен еңбегімен жүзеге асты.
Шолу алаңы — бұл тек көрініс тамашалайтын орын ғана емес. Бұл — кәсіпорынға басқа қырынан көз тастап, оның ауқымын сезінуге мүмкіндік беретін ерекше нүкте. Карьердің биіктен ашылатын көрінісі әр қызметкердің жүрегінде мақтаныш сезімін оятады. Себебі бұл жерде шын мәнінде өз ісінің шеберлері еңбек етеді.
Айта кетерлігі, шолу алаңы тек «ҚМ» АҚ қызметкерлері мен ресми қонақтары үшін ғана қолжетімді. Осы шектеулі мүмкіндік бұл орынның ерекше құндылығын арттыра түседі. Мұнда келген әр адам тек естелік сурет емес, ұзақ уақыт бойы ұмытылмас әсер қалдыратын ерекше сәттермен оралады.