«Қостанай минералдары» акционерлік қоғамы қоршаған ортаға әсерді азайтуға бағытталған экологиялық бастамаларды одан әрі дамытып, заманауи технологияларды енгізуде үздіксіз алға басуда. Осы аптада Еожан Татишевті еске алуға арналған Спартакиада қатысушыларына арнайы ұйымдастырылған экскурсия барысында қонақтар кәсіпорынның жаңа су тазарту кешенін аралап, күн панельдерінің іске қосылу рәсіміне куә болды.
 
Жаңа су тазарту кешені
ZOS Modul Oil-85 атты жылжымалы тәжірибелік қондырғы — жұмыс істеп тұрған жинақтаушы тоғанға ағатын карьер суларын тазартуға арналған. Бұл жобаға 120 миллион теңге қаражат бөлініп, оны жүзеге асыруды «TAZAU — Тазарту Қондырғылары Зауыты» ЖШС қолға алған. Тазарту процесі бірнеше кезеңнен тұрады: Алдымен жұқа қабатты модуль арқылы судағы механикалық қоспалар жойылады, кейін ламинарлы (коалесцентті) модуль мұнай өнімдері мен ұсақ бөлшектерді ұстап қалады, соңында сорбциялық сүзгі суға толық тазалық береді. Мамандардың мәліметінше, тазартылған судағы ластаушы заттардың мөлшері қатаң белгіленген нормативтерден аспайды: қалқымалы заттар – 100 мг/л-ден артық емес, мұнай өнімдері – 20 мг/л-ден төмен, биохимиялық оттегі тұтыну көрсеткіші – шамамен 3 мг/л. Бұл жоба табиғатқа түсетін зиянды азайтып, өңірдің экологиялық қауіпсіздігін арттыруға зор үлес қосады.
 
Күн панельдері — 
энергияның жасыл көзі
Кәсіпорында ұзақ уақыт күтілген тағы бір ауқымды жоба — жаңа күн электр станциясының іске қосылуы өтті. Бұл туралы құрылыс кезеңінде бірнеше мәрте айтылған болатын. Күн панельдері 13,6 гектар аумақты қамтиды және олардың жалпы қуаты 3,2 МВт-ты құрайды. Жоба аясында 5751 Jinko модулі мен 10 Huawei инверторы орнатылды. Жылына болжамды энергия өндіру көлемі – 4780 МВт·сағ, бұл кәсіпорынның энергия қажеттілігін ішінара қамтамасыз етіп, көміртегі ізі мен экологиялық әсерін айтарлықтай төмендетеді. Станция жұмысы толығымен қашықтан басқарылады: диспетчерлік пункт нақты уақытта көрсеткіштерді бақылап, ақпарат мобильді құрылғыларға да қолжетімді.