«Қостанай минералдары» АҚ үшін спорт пен салауатты өмір салты — жай ұран емес, нақты іске айналған бағыт. Осы мақсатта кәсіпорын бірнеше жылдан бері @km_run_club жүгіру клубына тұрақты қолдау көрсетіп келеді.

Бүгінде бұл клуб Жітіқара ауданының әртүрлі жастағы, түрлі мамандық иелерін бір ортаға тоғыстырған. Мұнда әр жаттығу қозғалысқа деген құлшынысты арттырып, денсаулықты нығайтып қана қоймай, адамдар арасындағы достық пен өзара қолдауды да күшейтеді. Жаттығулар барлық ниет білдірген тұрғындар үшін ашық.

Жыл басындағы игі дәстүрге сай, кәсіпорын клубтың материалдық базасын нығайтуға демеушілік көрсетті. Жаттығулардың тиімді өтуі үшін гантельдер, кілемшелер, фитнес-резеңкелер, доптар, роллдар, степ-платформалар және басқа да қажетті спорттық құрал-жабдықтар сатып алынды.

Алдағы уақытта да «Қостанай минералдары» АҚ спортты өмір салтына айналдырған бастамаларды қолдап, қозғалысты серік еткен барша тұрғындарды КМ Run Club жаттығуларына қосылуға шақырады.