Жітіқарада болашақ мамандарға бағытталған тағылымды шара өтті. «Қостанай минералдары» АҚ-ның бастамасымен ұйымдастырылған бос жұмыс орындары жәрмеңкесі қала мектептерінің жоғары сынып оқушылары мен студенттерін бір алаңға тоғыстырды. Кездесу барысында жастарға еңбек нарығында сұранысқа ие мамандықтар, тұрақты жұмысқа орналасу мүмкіндіктері, әлеуметтік қолдау тетіктері мен мансаптық өсудің нақты жолдары кеңінен таныстырылды. Сонымен қатар, оқумен қатар кәсіби тәжірибе жинап, өндірісте білікті тәлімгерлердің жетекшілігімен алғашқы еңбек жолын бастауға болатыны айтылды.
Іс-шара аясында «Қостанай минералдары» АҚ-ның құрылымдық бөлімшелері, сондай-ақ серіктес кәсіпорындар – «МехЛитКом» ЖШС мен «Дәмді» ЖШС өз қызмет бағыттарын таныстырды. Сонымен қатар Жітіқара политехникалық колледжіне арнайы бөлім арналды. Онда мектеп оқушылары жұмысшы мамандықтары бойынша білім алуға шақырылып, кейін қала кәсіпорындарында өндірістік тәжірибеден өтіп, тұрақты жұмысқа орналасу мүмкіндігі бар екені айтылды.
Шара мазмұнды да әсерлі форматта өтті. Қатысушылар мамандықтар мен корпоративтік өмір туралы бейнероликтерді тамашалап, жүлделер тігілген викториналарға, командалық тапсырмаларға қатысты. Сондай-ақ бүгінде қала кәсіпорындарында табысты еңбек етіп жүрген колледж түлектерімен еркін форматтағы кездесулер ұйымдастырылды. Жанды әңгіме мен нақты мысалдар білім алуға және өз мүмкіндігін сынауға дайын әрбір жас үшін өсу мен дамуға жол ашық екенін көрсетті.
Қатысушылардың көбі үшін бұл басқосу кәсіби бағдарды айқындауға жол ашып, болашағын туған қаламен байланыстырып, өзіне лайықты әрі тұрақты жұмысты жергілікті жерден табуға болатынына көз жеткізді.