Бағдат АБДОЛЛАҰЛЫ

«Қостанай минералдары» АҚ басқарма төрағасы Ербол Нұрхожаев Қостанай облысының делегациясы құрамында 23 қаңтар күні Астана қаласында өткен «Атамекен» Қазақстан Республикасы Ұлттық кәсіпкерлер палатасының XIII съезіне қатысты.
«Атамекен» Қостанай облысы кәсіпкерлер палатасы Өңірлік кеңесінің мүшесі Ербол Сапарбайұлы өңірдің өнеркәсіптік бизнесінің мүддесін ел деңгейінде ұсынып отыр.
Съезд барысында кәсіпкерлік ортаны дамытудың өзекті мәселелері, бизнес пен мемлекет арасындағы өзара іс-қимыл тетіктері талқыланып, «Атамекен» Ұлттық кәсіпкерлер палатасының жаңа төрағасы сайланды.

«Қостанай минералдары» АҚ басшылығының Ұлттық кәсіпкерлер палатасының жоғары органы жұмысына қатысуы кәсіпорынның өңірлік және республикалық деңгейде іскерлік күн тәртібін қалыптастыруға, сондай-ақ Қостанай облысы бизнес-қоғамдастығының мүдделерін қорғауға белсенді қатысатынын айғақтайды.
Айта кетейік, 22 қаңтар күні өткен «Атамекен» ҚР ҰКП-ның съезд алдындағы кеңесіне еліміздің барлық өңірлерінен 400-ден астам кәсіпкер, салалық қауымдастықтар мен өңірлік кеңестердің өкілдері, сондай-ақ орталық мемлекеттік органдардың өкілдері ат салысты.

Съезд алдындағы кеңес кәсіпкерліктің жүйелі мәселелерін талқылауға және мемлекетпен бірлескен шешімдер әзірлеуге арналған маңызды диалог алаңы болды. Кездесу барысында өңдеу өнеркәсібі, логистика және тасымал, құрылыс және жер қатынастары, туризм, білім беру, салық салу және денсаулық сақтау салаларындағы өзекті мәселелер қозғалды.