Жітіқара қаласында «Қостанай минералдары» АҚ Ардагерлер кеңесінің ұйымдастыруымен ерлер арасында волейболдан турнир өтті. Бұл жарыс волейболды өмірінің ажырамас бөлігіне айналдырған жандардың басын қосқан тағылымды кездесу болды. Қатысушылар үшін спорт тек бәсеке емес, сонымен қатар достық пен белсенді өмір салтының көрінісіне айналды.
Жарыс «Қостанай минералдары» АҚ Ардагерлер кеңесінің төрағасы Игорь Иванович Гусевтің жетекшілігімен ұйымдастырылды. Іс-шараның жоғары деңгейде өтуіне кәсіпорынның өзі басты демеуші ретінде қолдау көрсетті. Ал жарыстың бас төрешісі болып «Хризотил» филиалының төрағасы Александр Коробко қызмет атқарды.
Наурыз мейрамы қарсаңында өткен турнирде алаңға төрт команда шықты: «Перелески», «КМ ардагерлері», Жітіқара волейболының ардагерлерінен құралған «ВДВ» және Мәдениет сарайында жаттығатын спортсүйер жандардан жасақталған «Денсаулық тобы». Алғашқы ойындардан-ақ достық сипатта өткен жарыста ешбір команда жеңісті оңайлықпен бермейтіні байқалды. Қатысушылар ұйымшылдықтарын, тәжірибелерін және шынайы спорттық мінездерін көрсетіп, әр партия тартысты өтті.
Турнир қорытындысы бойынша сенімді жеңіске жылдам әрі үйлесімді ойын өрнегін көрсеткен «ВДВ» командасы жетті. Қиын да тартысты бәсекеде екінші орынды «КМ ардагерлері» иеленді. Үшінші орын Перелески ауылынан келген командаға бұйырды. Ал «Денсаулық тобы» командасы жеңіске деген жігері үшін «Хризотил» филиалының арнайы жүлдесімен марапатталды.
Осындай жарыстар қатысушыларға бас қосып, еркін пікір алмасуға, спорттағы жастық шақтарын еске алуға, белсенді өмір салтын сақтауға мүмкіндік береді. Сонымен қатар, олар өз үлгілері арқылы жастарға спортқа деген сүйіспеншіліктің жас талғамайтынын көрсетеді.
Ардагерлер кеңесі жарысты ұйымдастыру мен өткізуге қолдау көрсеткені үшін «Қостанай минералдары» АҚ басшылығына, кәсіпорынның спорт бөлімінің басшысы Жангелді Тулубаевқа және Александр Коробкоға алғыс білдіреді.