Жітіқара политехникалық колледжінің студенті кәсіби шеберлік байқауының қорытындысы бойынша сапалы орындалған дәнекерлеу жұмысы үшін 100 000 теңге көлемінде сыйақы алды. Байқау колледждің оқу шеберханалары базасында «Қостанай минералдары» АҚ-ның ұйымдастыруымен өтті.
«Қостанай минералдары» АҚ мен Жітіқара политехникалық колледжі арасындағы ынтымақтастық көп жылдан бері тұрақты әрі нәтижелі жалғасып келеді. Соның кезекті дәлелі – «Дәнекерлеу ісі» құзыреті бойынша өткен кәсіби шеберлік байқауы. Кәсіпорын үшін бұл – мамандыққа алғашқы қадам жасап жатқан, өз дағдыларын іс жүзінде көрсетуге дайын студенттерді қолдауға бағытталған қалыптасқан тәжірибе.
Байқауға тоғыз студент қатысты. Олардың қатарында бірінші курс студенттері де, бітіруші түлектер де болды. Бұл әр оқу кезеңінде кәсіби дағдылардың қалай қалыптасатынын көруге мүмкіндік берді.
Жарыс қорытындысы бойынша ақшалай сыйлықтар қарастырылған. Бұл – жастар үшін жақсы мотивация, – деді «Қостанай минералдары» АҚ Оқу орталығының басшысы Иралия Семиндерова.
Алғашқы минуттардан-ақ шеберханаларда жұмыс атмосферасы қалыптасты. Қатысушылар орындарына жайғасып, құрал-жабдықтарын дайындап, тапсырмаларды орындауға кірісті. Байқау базалық дағдыларды, ұқыптылықты, дәлдікті және ұзақ уақыт бойы шоғырлана жұмыс істеуді талап етті. Дәнекерлеу жұмыстары бірнеше сағатқа созылып, әрбір қателік қорытынды нәтижеге әсер ететін маңызды факторға айналды.
Дайын бұйымдар міндетті түрде герметикалылыққа тексерілді. Бұл – жұмыстың сапасын бірден айқындайтын негізгі кезеңдердің бірі. Дәл осы сәтте кімнің тапсырманы үздік орындағаны анықталды.
Жітіқара политехникалық колледжінің директоры Марат Аблаев барлық қатысушылардың лайықты деңгейде өнер көрсеткенін атап өтті:
Барлық студенттер тапсырманы жақсы орындап, кәсіби білімдерін көрсетті. Біздің әлеуметтік серіктесіміз – «Қостанай минералдары» АҚ жұмыстарды қатаң бағалап, қорытынды шығарды. Тәжірибесі аз қатысушылардың өзі жақсы деңгей көрсете алды.
Студенттердің айтуынша, мұндай байқауларға қатысу – ең алдымен тәжірибе жинақтаудың мүмкіндігі.
Бұл байқауға қатысуыма себеп – кейбір жұмыстарды әлі толық меңгермегенім. Мысалы, бүгін құбыр дәнекерлеуде кемшіліктер болды. Дегенмен тәжірибе жинау үшін келдім, – деді Влад Биристюков.
Қатысу өте қызықты болды. Өзім бастама көтердім, себебі осындай байқауларда өзімді сынап көргенді ұнатамын. Жеңіске мүмкіндік бәрімізде бірдей болды деп ойлаймын. Қалай болғанда да, бұл байқау мен үшін пайдалы болды, – деді Рустам Шатенов.
Қорытынды бағалау кезінде дәнекерлеу сапасы, дәлдік және жұмысқа деген жалпы көзқарас ескерілді. Нәтижесінде ешбір қатысушы назардан тыс қалмады: барлығына естелік сыйлықтар мен 10 000 теңге көлемінде ақшалай сыйақы табысталды.
Марапаттау алдында «Қостанай минералдары» АҚ бас механигі Талғат Юсупов студенттерге жылы лебізін білдірді:
Сіздер екі есе мақтауға лайықсыздар: біріншіден, осы байқауға қатысқандарыңыз үшін, екіншіден, осы мамандықты таңдағандарыңыз үшін. Алдағы уақытта бәрі сәтті болады деп сенемін. Қатысқандарыңызға үлкен рақмет.
Сондай-ақ ол өндірістік оқыту шеберлері Мендыбай Байтышев, Самат Исркепов, Ерлан Байтлеуов және Фариза Токкабуловаға студенттерді даярлауға қосқан үлестері үшін алғыс хаттар табыстады.
Байқау қорытындысы бойынша үшінші орынды Артём Дущенко иеленіп, 50 000 теңге алды. Екінші орын Болатбек Жумабаевқа бұйырып, оған 75 000 теңге табысталды. Ал бірінші орынды Дмитрий Баранов жеңіп алып, 100 000 теңге сыйақыға ие болды және колледж атынан өңірлік кезеңде қатысу мүмкіндігіне ие болды.
Мен екінші курста оқимын. Бұл – менің екінші байқауым және екінші жеңісім. Жеңіске жетіп, тәжірибе жинақтау өте қуанышты. Баршаңызға рақмет! – деді жеңімпаз.
Мұндай байқаулар болашақ мамандарды даярлаудың маңызды бөлігіне айналып отыр. Олар студенттердің білімін бекітіп, мамандықтың нақты талаптарын сезінуге мүмкіндік береді. Ал кәсіпорын үшін бұл – болашағы зор жас мамандарды ерте кезеңнен танып, қолдау көрсетудің тиімді жолы.
