Өткен демалыс күндері Қостанай ауданының Осиновка ауылы маңындағы демонстрациялық алқаптарда көшпелі дәстүрлер мен ХХІ ғасыр технологияларын тоғыстырған ауқымды «Қостанай дала фестивалі» өтті. Өңірдегі аграрлық маусымның басты шарасына Қазақстан Республикасының Ауыл шаруашылығы министрі Айдарбек Сапаров пен облыс әкімі Құмар Ақсақалов қатысты.
Фестивальге Жітіқара ауданы да белсенді түрде атсалысты. Аудандық алаңды ұйымдастыру жергілікті әкімдік пен қала құраушы кәсіпорын – «Қостанай минералдары» АҚ-ның тығыз өзара іс-қимылының нәтижесінде жүзеге асты. Кәсіпорын фестивальге киіз үй ұсынды. Қала құраушы бизнестің осындай бастамаларға қолдау көрсетуі компанияның Жітіқара ауданының мәдени және әлеуметтік өміріндегі маңызды рөлін айғақтайды.
Көрме ретінде тігілген киіз үйдің ішінде фестиваль қонақтары хризотил-асбесттен өндірілетін «Қостанай минералдары» АҚ-ның инновациялық өнімдерімен танысты. Көрме стендтерінде заманауи құрылыс материалдары – террасалық тақтай, шифер және хризотилцементтік плиталар ұсынылды. Бүгінде аталған өнімдер ауқымды инфрақұрылымдық жобаларды жүзеге асыру барысында кеңінен қолданылуда.
Фестивальде ауданның индустриялық әлеуеті жергілікті кәсіпкерліктің жетістіктерін көрсететін ауыл шаруашылығы өнімдерінің мол көрмесімен толықты. Ауданның 90 жылдығына орай әзірленген экспозиция өңірдің аграрлық әлеуетін жан-жақты таныстырды. Мұнда өнеркәсіп пен ауыл шаруашылығының қатар дамып, аумақтың тұрақты әлеуметтік-экономикалық өсіміне негіз қалыптастырып отырғаны көрініс тапты.
